Profisa Ibrahim Lipumba akiwa na katibu wa CUF Malim Seif Hamad

Profisa Ibrahim Lipumba akiwa na katibu wa CUF Malim Seif Hamad

Mwenyekiti wa Chama cha Wananchi (CUF) cha nchini Tanzania Prof. Ibrahim Haruna Lipumba leo ametangaza kujiuzulu uwenyekiti wa chama hicho. Tamko hilo la Prof. Lipumba linahitimisha siku mbili za minong’ono na tetesi zilizogubika medani ya kisiasa nchini kuwa kiongozi huyo anaondoka katika chama hicho hali iliyolazimu wananchama, wapenzi na mashabiki wa kiongozi huyo kufurika makao makuu ya chama hicho Buguruni Dar es Salaam jana ili kujua hatma ya kiongozi wao huyo. Akizungumzia sababu za kujiuzulu kwake, Profesa Lipumba amesema amekerwa na hatua ya Umoja wa Katiba ya Wananchi (Ukawa) ambao CUF ni chama shiriki kushindwa kusimamia makubaliano yaliyopelekea kuundwa kwa umoja huo. Amesema Ukawa ulianzishwa kulinda maslahi ya wananchi yaliyoainishwa kwenye Katiba iliyowasilishwa kwenye Bunge Maalumu la Katiba, na kwamba nafsi yake inamsuta hivi sasa kuendelea na uongozi huku waliokuwa wanaipinga Rasimu ya Katiba ya Jaji Warioba wakikaribishwa kuwania uongozi wa nchi kupitia umoja huo. Prof. Lipumba amesema baada ya kujiuzulu atajikita kufanya shughuli za kitaaluma kwa kujihusisha zaidi na ushauri wa masuala ya uchumi na maendeleo. Lipumba ametangaza uamuzi huo leo Mbele ya waandishi wa habari katika ukumbi wa hoteli ya Peacock jijini Dar es Salaam na kusema atabaki kuwa mwanachama wa kawaida wa CUF